«Казанга гашыйк бул» видеороликлар конкурсында җиңүчеләргә – 100 кг чәк-чәк һәм суперсәяхәт

Конкурс эшләре 20-нче сентябрьгә кадәр кабул ителәчәк, нәтиҗәләр 27-нче сентябрьдә – Халыкара туризм көнендә игълан ителәчәк.

Татарстан башкаласында Шәһәр көне алдыннан «Казанга гашыйк бул» видеороликлар конкурсы старт ала, анда теләге булган һәркем катнаша алачак. Моның өчен кыска видео төшерергә һәм шәһәрдә яраткан урының турында сөйләргә кирәк. Җиңүчеләр 100 кг чәк-чәк яки квадрокоптер алачак, ә төп приз өч миллионлы турист маршруты буенча сәяхәт булачак. Бу хакта бүген эшлекле дүшәмбедә туризмны үстерү комитеты директоры Дарья Санникова сөйләде.

Конкурста катнашырга теләүчеләргә яраткан урыннар, вакыйгалар, Казанда туристлык потенциалына ия булган объектлар турында кимендә биш минут дәвамлылыгы белән видеоролик төшерергә кирәк. Шуннан соң роликны YouTube видеохостингында яки Instagram, «ВКонтакте» яки TikTok социаль челтәрләрендә #ВлюбисьвКазань конкурс хештегы белән урнаштырырга һәм @gokazan.ru аккаунтны билгеләргә кирәк. Шуннан соң конкурс сайтында анкета тутырырга кирәк.

Видео смартфонга да, һөнәри видеокамерага да төшерелгән булырга мөмкин. Авторлык катнашучы яки катнашучылар командасыныкы булырга тиеш. Проектта бер катнашучыдан яки командадан бер генә видео катнаша ала.

Конкурс өч номинация буенча узачак: «Казан: гастрономик караш», «Архитектуралы Казан» һәм «Романтик Казан».

Бүләкләр арасында – 100 кг чәк-чәк һәм квадрокоптер, ә төп приз – өч миллионлы турист маршруты буенча сәяхәт: Казан буенча ике көнлек тур биш йолдызлы кунакханәдә яшәүне, иң яхшы милли рестораннарга баруны, экскурсияне, спектакль карауны һәм башкаларны үз эченә ала.

Конкурс комиссиясе составына Казанның баш архитекторы Илсөяр Төхвәтуллина, волейбол буенча Россия җыелма командасы капитаны Евгения Старцева, Татарстан Республикасы пешекчеләре гильдиясе вице-президенты Илгиз Галиев, «Татмедиа» республика агентлыгы җитәкчесе урынбасары Эдуард Хәйруллин, блогер Алиса Сказка, шулай ук Россиянең танылган телевидениесе алып баручысы Яна Чурикова керәчәк.

«Казанга гашыйк бул» конкурсы – зур проектның бер өлеше. Без Казан турында бөтен Россия һәм чит илләрдә белүләрен телибез, безнең турыда сөйләсеннәр, безгә кунакка килсеннәр, дусларыбыз һәм танышларына киңәш итсеннәр», – диде Д.Санникова.

Конкурс эшләре 20-нче сентябрьгә кадәр кабул ителәчәк, нәтиҗәләр 27-нче сентябрьдә – Халыкара туризм көнендә игълан ителәчәк.

Татарстан башкаласы Мэры Илсур Метшин конкурсны уздыру идеясен бәяләде. «Безнең Казан турында кызыклы илһамландыручы роликлар көтәчәкбез», – диде ул.

Чыганак: Казан мэриясе сайты

Иң мөһим һәм кызыклы язмаларны Татмедиа Telegram-каналында укыгыз


Ошый
101
0
0
Комментарийлар (0)
Cимвол калды: